ذكري خيانتك

فاكرة لما اتغيرت بينا المعاني والسطور 

فاكرة لما اتبدلت احلامنا  في لحظة غرور 

فاكرة لما ضاعت  البسمة الجميلة والسرور 

 فاكرة لما اكتشفت كل الحقايق والامور

لما شوفت  في لحظة جواكي الحقيقة كدبة راقدة 

والحقيقة تجر وياها الحقيقة  وانت صامدة 

زي عقد اتفرطت حباتة واحدة بعد واحدة 

هيا دية لحظة خروجك من حياتي شر طردة

لعبت الصدفة البريئة دور في اظهار الحقيقة 

لما شوفتك مرة دايبة جوا احلامك  غريقة 

لما حسيت من كلامك لهفة الشوق  الجريئة 

لما لاحت من عينيكي نظرة الحب الدنيئة 

 فجأة  حسيت بالدمار والانهيار  دمر حياتي 

صدمة جامدة اتحطمت فيها امالي وامنياتي 

ماتت الدنيا الجميلة في  قلبي تاهت زكرياتي  

تحت جدران الحقيقة اتكسرت جوايا ذاتي

سكنت الضلمة الكئيبة في قلب  مليان بالجراح 

تاهت الخطوة الجريئة في سكة الوهم اللي راح

سكتي هم وكأبة ليل ما يطلعلوة صباح 

والغريبة انك يا ظالمة جاية تتمني السماح 

انتي فاكرة اني صحيح ممكن اسامحك علي اللي كان

او اسامحك علي الخيانة بعد ما اديتك امان

ولا ممكن انسي غدرك وانسي تجريح  الزمان 

واكتشافي للحقيقة بعد ما فات الاوان

  لا يا خاينة ماتحلميش مش حتضعفني هزيمتك

مش هايئلمني  عذابك مش هاتغريني ابتسامتك  

لا ولا يشد انتباهي كلماتك حتي او صمتك  

ضاعت الرحمة الي عندي   والسبب   

               ذكري خيانتك