من غير عنوان

انا فتحت المدونه وعاوز اكتب فيها وخلاص

بس مش عارف هكتب ايه علي الرغم اني داخل علي دور اكتئاب وانا لما بكتئب بصراحه بقعد اضحك ههههههههه فانا لو كتبت في المدونه وانا مكتئب كدا ههيس جامد

حاسس اني زعلان من حاجات كتير ومن ناس كتير واولهم نفسي معدتش بقعد انا وهيه زي زمان ولا اكلمها ولا بتكلمني زي ما نكون مخاصمين بعض ولا حتي بقيت بعاتبها حاسس اني بقالي فتره عايش في حالة صمت بس الحاله دي طولت معايا شويه مبقتش حتي افكر افكر عملت ايه او معملتش ايه او المفروض اللي جاي يبقي ازاي المفروض اني دلوقت بقيت في مامورية كبيرة اوي سنه مهمه عليا والمفروض انجح فيها واركز اوي وهي كلها كام شهرين وتخلص وانا ولا هنا حتي النوم بقا يوم اة وباقي الايام بقعد افكر انام ولا لا علي الرغم اني ببقا تعبان جدا بس مش بعرف انام مش عارف لية

بس بردو دا ميمنعش اني نفسي انام جدا ومش عارف فليه بقي مش بنام ؟!!!!! سؤال يطرح نفسه

سيبكوا انتوا اتفضلوا شيكولاته يا جماعه هنقعد نتكلم كدا من غير ما تاكلوا ولا تشربوا حاجه بس لو اخدتوا شيكولاته يبقي حته صغيره علشان معتش معايا الا واحده اقولكم انتوا شكلكم مالكوش في الشيكولاته يلا وفرتم

نرجع بقي لمرجعونا الا وهو الاكتئاب الفظيع الشنيع اللي حاسس بية انهارده ان اي حد قابلته كان عنده اكتئاب وبيضحك من غير نفس واحد يقول مش عاارف ليه كل حاجه بقي مالهاش طعم التاني يرد عليه ويقوله وايه اللي بقي له طعم والتالت يقول مش عارفه الايام دي بقت عامله كدا ليه وعاملينلي زي اللي بقي عندهم مية سنه هيا الحياه والظروف اللي حولين الناس هي اللي خلت كل حاجه فعلا مبقاش ليها طعم والا احنا السبب الرئيسي في كل دا

حالة الصمت بتاعتي فعلا طولت معايا حبتين وعاوز اعمل ثوره علي نفسي واعاتبها كتير اوووي

ونفسي اغير طبعي ومضحكش وانا مكتئب او انا مضايق مضحكش الا لما اكون عاوز اضحك وتبقي الضحكه من جوايا بس لو استنيت كدا مش هضحك خالص اكيد

لما ببقي مضايق بضحك كتير واهزر كتير اوووووووي مش عارف دي ميزه والا عيب والا هروب

سيبكوا انتوا مقولتوليش تاخدوا ايه بما اني اصلا مش حديكم شيكولاته نمشيها نسكافيه وامري لله

نرجع تاني لل15 موضوع اللي انا فتحتهم في نفس ذات اللحظه اقولكم نتكلم في موضوع تاني احسن

مش لاقي حاجة الصراحة اقولها من الاكتئاب دة اقولكم علي حاجة نرجع لموضعنا القديم

حالة ملل طولت شويه وحالة صمت طولت اكتر مش عارف انا لو مكنتش في حالة صمت كنت عملت ايه المهم انا نازل كلام كلام وبقول اني في حالة صمت لا بس بجد اي موقف ادامي او اي شيء بقي اقرب رد ليا هو الصمت

ماشيين بدري ليه يا جماعه النسكافيه كان خلاص علي وشك انه يخلص خلاص بقي طالما حلفتوا اشربوه في الزياره التانيه دا ان شوفتكم تاني بعد دور الاكتئاب اللي ممكن ينتشر ويتوغل لكل الزوار فاحترسوا انا حذرت وماليش دعوه