محتار قوي

انا مش غايب ولا حاجة انا متابع دايما

لكن نفسيا مش متظبط خــــــــــالص ومش عارف افكر ولا اكون رأي حتى عن اي حاجة بقرأها

انا كنت مبسوط بقالي فترة الحمد لله لكن دوام الحال من المحال

بقيت حاسس اني عامل زي الي وقع في بير غويط وفضل يقع ويقع ويقع مش بيوصل للنهاية ولا عارف يخرج من البير دا ولا حتى انه يثبت مكانه ويبطل يقع

احساس بشع لما تشوف النهاية قدامك وعارف انك لما توصلها رقبتك احتمال تنكسر لكن بتتمنى انك توصلها بس علشان تخلص من عذاب الحيرة والترقب والضياع والوحده والغربه والضلمه الي انت عايشهم دول

كل مرة كنت بتحط في موقف اختيار كنت بعرف احدد هدفي واختار

بس المرة دي الاختيار صعب قوي بالذات اني مش عارف انا عايز ايه

انا بجد مبقتش عارف الإختيار الصح من الغلط

حاسس اني نفسي اخبط راسي في الحيطة واطلع اجري

حاسس ان نفسي اغير كل الدنيا اللي حواليا

نفسي ارجع طفل صغير تاني

انا اصلا مش مقتنع اني كبير

طول الوقت بحس ان انا لسة صغير

طفل صغير خايف بضعف طفولي نفسه يهرب في حضن مامته علشان تحميه من الدنيا اللي حواليه كلها

طفل اعلى مكان بيتمنى يوصله هو كتف باباه لما بيشلوة

انا حاسس اني تايه قوي ومش لاقي حد يفهمني وافضفض معاه بحرية

علشان كدا جيت افضفض هنا في اكتر مكان ممكن يسمعني

ويقرا اللي جوايا انا تايه ومحتار قوي قوي قوي وكل شوية وجهة نظري بتختلف ومش عارف اختار ولا افكر حتى