هـعــرف أعــــــيـش

تعبان مالدنيا ومش قادر أتحمل..

شايل جوايا وماشي بهموم تهد جبال..

شايل جوايا وساكت.. وهتكلم ليه؟؟!

محدش هيسمع.. محدش هيفهم..

والكل فاكر انني سعيد وطاير!!

وأنا أصلا مالحزن قربت أنسي طعم الفرح..

الكل باصصلي وبيحسدني!!

آه.. لو تعرفوا اللي بيا عليا راح تبكوا وتصرخوا..

مالناس مش شايفة غير الظاهر.. صوره جميله وشفايف متبسمه..

لكن اللي جوه القلب لو تشوفوه عليا راح تتألموا..

لوحدي ماشي وشايل هموم.. مش قادر أتكلم ولا عايز أقول..

وحتي عنيا جفت من كتر ما نزلت دموع..

دموع كل يوم بتنزل في الضلمه عالخدين..

وشفايف كل يوم تضحك حتي مع القريبين..

ولا حد حاسس بيا.. ولا ناوي أشارك حد..

خلي همومي ليا يا قلبي.. أستر نفسك وعيش..

صحيح اللي جوايا لو حد تاني فيه مكانش استحمله..

لكن هداوي جراحي لوحدي..

مش هستني ايد حد تتمدلي.. مانا لسه عندي ايد

همسح بيها دموعي.. ومش هسمح لحد يشوفها..

هعرف أحل مشاكلي..

هعرف أداوي جراحي..

هعرف أحقق أحلامي.. وهعيش..